محەمەد رەسوڵ موراد
2017-03-23      1267 جار بینراوە        کۆمێنت

 راپۆرتێکی تایبەت بە کێشەی زیادەڕەویی زەویوزار لە سلێمانی

 

                                                                                                       

   محەمەد رەسوڵ موراد / سەرۆکی لیژنەی خزمەتگوزارییەکانی (شارەوانی، ئاو، کارەبا، هاتووچۆ، گواستنەوە و گەیاندن)/                                                                                                                                                 ئەنجومەنی پارێزگای سلێمانی

 

 

پێڕستی راپۆرتەکە

- پێشەکییەکی کورت لەسەر زیادەڕەوی

A/ زیادەڕەوی لە رووی بابەتییەوە:

 یەکەم/ ئەو زیادەڕەویانەی دەکرێنە سەر موڵکی گشتی لە دەوروبەری شارەکاندا.

 دووەم/ ئەو زیادەڕەویانەی دەکرێنە سەر موڵکی گشتی لە چەقی شارەکاندا.

 B/ زیادەڕەوی لە رووی کەسییەوە:

 یەکەم: زیادەڕۆکارانی خاوەن نفوز و دەسەڵات 

دووەم: زیادەڕۆکارانی هەژار و کەمدەرامەت 

سێیەم: زیادەڕۆکارانی دەوڵەت (حکومەت)

 C/ هۆکارەکانی پەرەسەندنی زیادەڕەوی 

 D/ هەوڵەکا بۆ بەرگرتن لە زیادەڕەوی و نە‌‌هێشتنی 

E / چی بکرێ بۆ بەرگرتن بە زیادەڕەوی و چارەسەرکردنی؟

 

 

  وەک هەموولایەک ئاگادارن ماوەیەکی زۆرە دیاردەی زیادەڕەوی رۆژ لە دوای رۆژ لە ناو شار و دەوروبەری شاردا لە زیادبووندایە. بە شێوەیەک بووەهۆی ئەوەی فەرمانگە حکومییەکان نەتوانن کاری خۆیان بکەن و بەرەنگاریی ئەم دیاردە قێزەونە ببنەوە، بە جۆرێک رەنگیداوەتەوە، کە هەیبەتی بۆ حکومەت و فەرمانگەکانی نەهێشتووەتەوە، تاکو کار بەوەگەیشتووە خەڵکانێکی گەندەڵ و دژە یاسا ئەم هەلە بقۆزنەوە و بکەونە داگیرکردنی موڵک و ماڵی گشتی و بەتاڵانبردنی فرۆشتنی و پێکەوەنانی سەروەت و سامانی ناڕەوا.

 بە مەبەستی کۆکردنەوەی زانیاریی پێویست لەسەر ئەم بابەتە، سەردانی لایەنە پەیوەنددارەکانمان کرد، و گەیشتینە ئە دەرەنجامانەی خوارەوە:

 A/ زیادەڕەوی لە رووی بابەتییەوە:

یەکەم: ئەو زیادەڕەوییانەی کراونەتە سەر موڵکی گشتی لە دەوروبەری شاری سلێمانی:

ئەو زیادەڕەوییانە کراونەتە سەر موڵکی گشتی لە گوندەکان و دەوروبەری گوندەکان و دەرەوەی شاری سلێمانی، کە سەرجەمیان زەویی وەزارەتەکانی شارەوانی، یان دارایی، یان کشتوکاڵن.

 ئێمە سلێمانیمان بە نمونە هێناوەتەوە، ئەگینا بارودۆخی شار و شارۆچکەکانی دیکەی هەرێم باشتر نیە، بەڵکو حاڵی هەندێ شار و شارۆچکە زۆر مەترسیدارە، بەڵام بە شانازییەوە ئەو ئازادیی رادەربڕین و بەدواداچون و شەفافییەت و دەستکەوتنی زانیاریی پێویست و کرانەوەیەی لە سلێمانی و دەوروبەری فەراهەمکراوە لە شارەکانی دیکەی هەرێم و عیراق و دراوسێی عیراقیش دەگمەنە.

 ئەم زیادەڕۆکارانە زەویی حکومەت داگیردەکەن و کڕین و فرۆشتنی پێوەدەکەن و بیناو کۆگای لەسەر دروستدەکەن، بێ ئەوەی گوێ بە یاساکانی وەزارەتی شارەوانی و وەزارەتەکانی دیکە بدەن. ئەمانە هەندێکیان چەکدارن و هەموو شێوازێکی بەرەنگاربوونەوە بەکاردێنن، وەک رووبەڕووبوونەوەی چەکداری، تاکو دەگاتە بەکارهێنانی ژن و منداڵ بۆ کارکردنە سەر هەست و ویژدانی بەرامبەریان، هەروەها هەندێکیان پشتیوانیی عەشائیری، یان حزبی، یان عەسکەی دەکرێن، کە تیمەکانی شارەوانی و هێزەکانی هاوکاری، ناتوانن بەرەنگاریان ببنەوە.

 
 

 ئەم شوێنانەی لە خوارەوە ئاماژەیان پێدەدەین هەرە دیارترینیانن، کە ئەم گوندانە و دەوروبەریان دەگرێتەوە:

 - گوندی ناوگردان/ دەکەوێتە باشوری رۆژهەڵاتی سلێمانیەوە، لە ماستەرپلاندایە و نەخشەی پەسەندکراوی هەیە، بەڵام ئەو شوێنەی زیادەڕەوی لەسەرکراوە لە دەرەوەی ماستەرپلانە، کە تاکو ئەم رێکەوتە زیاتر لە (٢٠٠) دوو سەد خانوو لەم شوێنە بە زیادەڕەوی دروستکراوە.

 - گوندی رازییانەی کانی شینکە/ لە رۆژهەڵاتی شاری سلێمانیە و نەخشەی پەسەندکراوی هەیە، لەم شوێنە پتر لە ١٠ دە دۆنم زەویی زیادەڕەوی لەسەر کراوە، ناوی سەرجەم زیادەڕۆکاران دراون بە دادگا، بەڵام کەسیان دەستگیرنەکراون

 - گوندی مەلا داود/ ئەم شوێنە لە رۆژئاوای سلێمانییە و دەکەوێتەسەر جادەی قەیوان، سنوری گوندەکە نەخشەی هەیە، بەڵام ئەوەی زیادەڕەوی لەسەرکراوە پتر لە ٧٠ حەفتا دۆنم زەوی دەبێت و دەکەوێتە دەرەوەی ماستەر پلانەوە نزیکەی ٢٥ بۆ ٣٠  باخی لەسەر دروست کراوە

 - گوندەکانی ئاڵیاوا و فەرەجاوا/ دەکەونە باشوری رۆژهەڵاتی سلێمانیەوە لەو دیو پردی تانجەڕۆوە کە نەخشەی پەسەندکراویان نییە. کۆمەڵێک خانویان بە زیادەڕەوی لێدروستکراوە

 - گوندی هوانە/ لە رۆژهەڵاتی سلێمانییە، نزیک شەقامی تانجەڕۆ (ناوچەی پیشەسازیی دوو)، لە ماستەرپلاندایە و بۆ خزمەتگوزاری تەرخانکراوە، بەڵام زیادەڕۆییەکی زۆری لەسەرکراوە.  

 - گوندەکانی کۆڵەبی و داربەڕوولە/ دەکەونە رۆژهەڵاتی سلێمانییەوە و نەخشەی پەسەندکراویان نییە، ژمارەیەک خانوویان لەسەر دروستکراوە، بەڵام کۆنترۆڵکراوە.

 - گوندی کانی سپیکە/ لە سنوری ماستەرپلانی شارەوانیی سلێمانی دایە، کە قاگعی (١٩٩) کەڵەکنی پێ دەگوترێ، زیادەڕۆییەکی فراوانی لەسەر کراوە پتر لە ١٣٠ سەدو سی سکاڵا دراوە بە دادگا، بەڵام کەس دەستگیرنەکراوە.

 - گوندی ژاڵەی سەروو و ژاڵەی خواروو/ دەکەوێتە سەر شەقامی (تانجەڕۆ – قەراغ)، کە نەخشەی پەسەندکراوی هەیە، بەڵام ئیفراز نەکراوە، واتە کەوتۆتە ماستەرپلانی شارەوانییەوە، بەڵام لەسەر کشتوکاڵ نەکوژاوەتەوە. پتر لە ( ٧٠)  کۆگای (٤٠٠)م^٢ بە جەمەلۆن لەسەر دروستکراوە.

 - گوندەکانی کانی حەمە و کانی پیرە/ کە نەخشەی پەسەندکراویان نیە، دەکەونەسەر شەقامی شار، کە هەریەکەیان پتر لە (٥٠) پەنجا خانوویان بە زیادەڕەویی لەسەر دروستکراوە.

 - گوندی تووەسپی/ لە دەرەوەی ماستەرپلانی سلێمانییە، لە سنوری ناحیەی بەکرەجۆیە، لەودیو بازگەی دۆڵەرووت هەڵکەوتووە، پتر لە (١٠٠٠) هەزار خانووی بە زیادەڕەوی لەسەر دروستکراوە.

 

 دووەم/ ئەو زیادەڕەویانەی کراونەتە سەر موڵکی گشتی لە چەقی شاردا:

 ئەو زیادەڕەوییانەی کە لە ناوەندی شارەکاندا کراون، بە شێکی تری زیادەڕۆکان بۆ سەر شەقام و شۆستەکانە لە شوێنە گشتیەکاندا، کە بەهۆی ئەو قەیرانە داراییەوە زۆر زیادیانکردووە، ژمارەیکی زۆری هاوڵاتییان بەهۆی هەژاری و کەمدەرامەتی و بێ کاروکاسبیەوە لە ناوەندی شاردا هانا بۆ عارەبانە و دەستگێڕی دەبەن، بەمەش ناو بازاڕ بە تەواوی شێواوە و قەرەباڵغێکی زۆری دروستکردووە، بە تەواوی خەڵکی بێزارکردووە و هاتووچۆی هاوڵاتیان ئەستەم بووە، لە هەمانکاتدا دوکاندارەکان شۆستە و شەقامەکان بەکاردێنن و ئاستەنگ بۆ هاتووچۆی هاوڵاتیان دروستدەکەن، هەروەها ژمارەیەکی زۆر کابینە و کەپر و سەیارە لەسەر شەقامە گشتییەکان دانراون بۆ فرۆشتنی کاڵا جۆراوجۆرەکان، کە ئەمەش دیاردەی ناشارستانییە، و گلەیی و گازندەی زۆری هاوڵاتیانی لێکەوتۆتەوە.   

 

 B/ زیادەڕەوی لە رووی کەسییەوە

 یەکەم/ زیادەڕۆکارانی خاوەن نفوز و دەسەڵات

 ئەوانە بازرگانی گەورەی زەوین، پشتئەستور بە نفوز و دەسەڵاتیان موڵکی گشتی بە بەرچاوی حکومەتەوە داگیردەکەن، بە ئاشکرا و بێ سڵەمینەوە بە زەبری هێز پارچە زەویی گەورە کە دەیان دۆنم و هەندێجار سەدان دۆنم دەبێت. سیاج یان بلۆک بلۆک و دواتر پارچە پارچەی دەکەن و دەیفرۆشنەوە، ئەمانە لە سەرووی یاساوەن، دامودەزگاکانی حکومەت جگەلە پاڕانەوە و ئەملا و ئەولا کردن و قسەکردن لە راگەیاندنەکان دا هیچ دەسەڵاتێکیان نیە و ناتوانن رێگریان لێ بکەن

 

 

 دووەم/ زیادەڕۆکارانی هەژار و کەمدەرامەت

 ئەمانە زیادەڕۆکاری پارچە زەویی بچوکن، بەهۆی هەژاری و نەداری و نەبونی کار و کاسبی و شوێنی نیشتنەجێبون و بە نرخی زۆر کەم و بە قەرز و قۆڵەوە ئەم زەویانە دەکڕن و کەلاوە و خانوویان لەسەر دروستدەکەن و کڕین و فرۆشتنیان پێوە دەکەن، یاخود خۆیان و ماڵ و منداڵیان تێدا نیشتەجێدەکەن و دەبن بە ئەمری واقع و داوای خزمەتگوزاری و تاپۆکردنی دەکەن

 

سێیەم/ زیادەڕۆکارانی حکومەت

کە ئەمانە کارمەندی حکومەتن لەو دامودەزگایانەی کە پەیوەندیان بە پڕۆسەی جیاکردنەوە و دابەشکردنی زەوییەوە هەیە، کە لە نەبوونی سیستمێکی رێکوپێکی کارگێڕی لە جیاکردنەوە و دابەشکردنی زەوییەکان نەبوونی چاودێرییەکی پسپۆر و دڵسۆز بەسەر پڕۆسەکەوە، ئەوانە لە نێوان خۆیان دا پەیوەندی و هاوئاهەنگیی نامەشروع و نایاسایی دەبەستن بۆ وەلانان و هێشتنەوەی کۆمەڵێک بلۆک و پارچە زەویی نایاب و روکنەکان بە ناوی وەهمی و هەندێجار بە یاساییکردنیان و دواتر بەسەر خۆیاندا دابەشیدەکەن و دەیفرۆشن، لە زۆربەی کاتدا نوسینگەکانی کڕین و فرۆشتنی زەویوزاریش هاوبەش و هاوکارن

 

C/ هۆکاری پەرەسەندنی زیادەڕەوی

 ١- قەیرانە سیاسی و داراییەکانی هەرێم و ناوچەکە و ئەو گۆڕانکارییە سیاسی و داراییانەی هاوڵاتیان تێیکەوتوون. کە بەشێکی زۆریانی توشی هەژاری و نەداری و بێ جێگە و رێگە کردووە و بووەهۆی هەڵتۆقانی خەڵکانێکی خاوەن نفوز و دەسەڵات، کە هەندێکیان نابەرپرسانە دەستیان بە قۆرغکردنی زەویوزاری گشتی کردووە

 ٢- نەبوونی یاسایەکی توندوتۆڵ و یەکخراو (موحد) بۆ

      - چارەسەرکردنی کێشە جۆراوجۆرەکانی موڵکایەتی و زەوی

      - رووبەڕووبونەوەی زیادەڕۆکاران

٣- نەبوونی لامەرکەزیی (پارێزگاکان و دەزگا خزمەتگوزارییەکان) و نەبوونی چاودێرییەکی بەهێز و تۆکمە و بەسەر دەزگاکانی جێبەجێکردنەوە و بەسەرچوونی ماوەی یاسایی ئەنجومەنی هەڵبژاردراوی شارەوانیەکان و بێدەسەڵات و بێتوانایی ئەو ئەنجومەنانەی ئێستا لەکاردان، کە ناتوانن پارێزگاری لە موڵکی گشتی بکەن

٤- دابەشنەکردنی زەوی لە ساڵی (٢٠٠٦)ەوە چارەسەرنەکردنی کێشەی نیشتەجێبون و پێویستی هەزاران خێزانی بێ نەوا و زەویی نیشتەجێبوون

٥- لاوازیی هێزی دەزگاکانی پارێزەری موڵکی گشتی لە رووی چۆنایەتی و چەندایەتیەوە و بێتوانایی دەسەڵاتی جێبەجێکردن و داواکاری گشتی لە رووبەڕووبوونەوەی دیاردەی زیادەڕەوی

 

D/ هەوڵەکانی حکومەت بۆ رووبەڕووبوونەوەی زیادەڕۆکاران:

 ١- سەرۆکایەتیی ئەنجومەنی وەزیران ئاماژە بە بڕیاری ژمارە (٨)ی ساڵی ٢٠١٦ی سەرۆکی هەرێمی کوردستان دەدات، بە نوسراوی ژمارە (٤٨٥) لە  ١٨/٥/٢٠١٦ راسپاردەیەک  ئاڕاستەی (٧) دادوەری داواکاری گشتی دەکات و رایاندەسپێرێت بە پێکهێنانی لیژنەیەک بە سەرپەرشتی بەڕێز (ئازاد ملا ‌‌افندی) بە مەبەستی بەدواداچون و کۆکردنەوەی زانیاریی لەسەر گشت زیادەڕەوییەکانی سەر زەویی حکومەت لە هەرێمی کوردستان، کە داوادەکات ئەم لیژنەیە لە ماوەی یەک مانگدا کارەکانی تەواوبکات و زانیارییەکان بە راپۆرتێک بۆ سەرۆکایەتیی هەرێم  بەرزبکاتەوە

 ٢- نوسراوی نهێنی (بەڕێوەبەرایەتیی کاروباری یاسایی)/ وەزارەتی شارەوانی و گەشتوگوزار، ژمارە ( ٦٧) لە  ٣٠/٥/٢٠١٦  بۆ بەڕێوبەرایەتیی شارەوانییەکانی (هەولێر، سلێمانی، دهۆک، گەرمیان)، دەستەی گەشتوگوزار، سەرۆکایەتیی شارەوانی (هەولێر، سلێمانی، دهۆک، کەلار، هەڵەبجە) بۆ پێدانی زانیاریی تەواو و هاوکاریکردنی لیژنەی پێکهاتوو لە لایەن سەرۆکایەتیی ئەنجومەنی  وەزیران ژمارە (٤٥) لە ١٨/٥/٢٠١٦

 ٣- نوسراوی وەزارەتی ناوخۆ/ بەڕێوەبەڕایەتیی گشتیی دیوان/ بەڕێوبەرایەتیی کارگێڕی، ژمارە (١٣٣٢١) لە ١٤/٨/٢٠١٦، کە ئاماژە بە نوسراوی وەزارەتی شارەوانی و گەشتوگوزار، ژمارە (٥٥١٦) لە ٢٦/٧/٢٠١٦ دەدات، کە ئاگاداری سەرجەمی سەرۆکی یەکە کارگێڕییەکان دەکات، هاوکاری و هاوئاهەنگی لەگەڵ تەواوی شارەوانییەکانی سەر بە وەزارەتمان بکەن، بە مەبەستی نەهێشتنی دیاردەی زیادەڕەوی و جێبەجێکردنی فەرمانەکانی سەرۆکایەتیی ئەنجومەنی وەزیران.

 ٤- لە ناوەڕاستی مانگی ٢ی ٢٠١٧ دا فەرمانگەی داواکاری گشتی ئاگادارییەکی لە کەناڵەکانی راگەیاندن سەبارەت بەم دیاردەیە بۆ هاوڵاتیان بڵاوکردەوە، کە ئەمە ناوەڕۆکەکەیەتی "کەسانێک بەبێ گوێدانە یاسا و رێساکان بەتایبەت لە سنوری گوندەکانی نزیک شاری سلێمانی کە کەوتونەتە ناو ماستەر پلانی  شارەوانی سلێمانیەوە دەستییان بەسەر زەویی شارەوانی گرتوە و دەگرن و خانوو و بیناو کۆگاو دامەزراوەی دیکەی لەسەر دروستدەکەن، یاخود زەوییەکە بەش بەش دەکەن و بە شێوەی پارچە زەویی نیشتەجێبوون کڕین و فرۆشتنی پێوەدەکەن. ئەم کردارانە بە تاوان هەژماردەکرێت و فەرمانگەکەمان بە بەردەوامی بەدواداچوون دەکات، بۆ زانینی ناوی ئەو کەسانەی ئەو کارە ئەنجامدەدەن و سکاڵای سزای لە دژیان دەجوڵێنین، بەبێ رەچاوکردنی پلە و پایە و پێگەی کەسە زیادەڕۆکارەکان، هەربۆیە هاوڵاتیان ئاگاداردەکەینەوە خۆیان بەدووربگرن لە کڕینی ئەو زەوی و خانووانە و خۆیان نەکەنە قوربانی و پارە و داهاتی خۆیان نەکەنە گیرفانی کەسانێک، کە کڕین و فرۆشتن بە موڵکێکەوە دەکەن، کە هی خۆیان نیە، چونکە ئەو کڕین و فرۆشتنانە تاوانن و پوچەڵن، هەروەها رێکاری توند دەگرنەبەر بۆ رێگری لەو دیاردەیە و لابردنی زیادەڕۆکان". 

 ٥- نوسراوی بە پەلەی سەرۆکایەتی ئەنجومەنی وەزیرانی عیراق سەبارەت بە زیادەڕەویەکانی سەر زەوی حکومەت، ژمارە (م أ م / ١١٦ ) لە ٣١/١/٢٠١٧ کە ئاڕاستەی سەرجەم وەزارەتەکان و ئەنجومەنی پارێزگاکان و پارێزگاکانی عیراقی کردوە، داوادەکا لە ماوەی یەک هەفتەدا زانیاریی ورد و تەواو لە خشتەی هاوپێچدا تۆماربکەن لەسەر زیادەڕۆکانی سەر موڵکی گشتی لە رێگەی (Flash memory یان CD) بۆ دیوانی سەرۆکایەتیی ئەنجومەنی وەزیرانی بنێرن، بە مەبەستی ئاڕاستەکردنی سەرکردایەتیی ئاسایش بۆ لابردنی زیادەڕەوییەکان و راسپاردنی هێزی ئاسایشی تایبەت بۆ نەهێشتنی زیادەڕۆکان و گرفتی زیادەڕۆکان

 ٦- کۆبونەوەی پارێزگاری سلێمانی لەگەڵ لایەنە پەیوەنددارەکان لە ناوەڕاستی مانگی ٢ی ٢٠١٧ دا کە بڕیاردرا بە زوترین کات هێزێکی هاوبەش لە پۆلیس و ئاسایس و لیوای پاراستنی سلێمانی پێکبهێنرێت، پەلە لە ئیجرائاتی پێویست بکەن، بەڵام تا ئێستا هیچ نەکراوە

 ٧- هەر لە مانگی  ٢ ی ٢٠١٧ دا سەرۆکی شارەوانیی سلێمانی لە کۆنگرەیەکی رۆژنامەوانی دا هانای بۆ وەزارەتی ناوخۆ و پێشمەرگە برد و داوای لە حکومەت و داواکاری گشتی کرد، کە بەزووترین کات بێن بە هانایانەوە کە خەڵکانێک دژ بە یاسا و رێنمایەکان قاچاخچیەتی بە موڵک و ماڵی حکومەتەوە دەکەن و دەبنە ملیۆنێر، لەگەڵ ئەوەی چەندین جار کۆبونەوەی لەسەر کراوە و سەرۆکی حکومەت و وەزارەتی ناوخۆ نوسراوی ئاڕاستەی هەموو بەپرسی ئیداری و شارەوانیەکان کردووە کە ئیجرائاتی بە پەلە بکەن، بەڵام تاکو ئێستا هیچ ئیرادەیەک نیە وە هیچ هێزێک ئامادە نەکراوە و هیچ داواکاری گشتی یەک سکاڵایان لەسەر هیچ کەسێک تۆمارنەکردووە و نە کەس گیراوە و نە زیادەڕۆکان رووخێنراون، بەڵکو رۆژانە زۆرتر دەبن و بەردەوامن، چونکە دەزانن حکومەت بێدەنگە

 

E/ چی بکرێ بۆ رێگریکردن لە زیادەڕەوییەکان و چارەسەرکردنیان؟

١- کاراکردنەوەی پەرلەمانی کوردستان و پەلەکردن لە هەموارکردنەوەی ئەم یاسایانەی خوارەوە، بە مەبەستی چەسپاندنی لامەرکەزیی پارێزگاکان و دامودەزگاکان

- هەموارکردنەوەی ئەو یاساو بڕیارانەی پەیوەندیدارن بە خاوەندارێتیی زەوییەوە، بە شێوەیەک بەرژەوەندیی موڵکی گشتی پارێزراو بێت.

- هەموارکردنەوەی یاسای بەرەنگاربونەوەی زیادەڕەوی و توندکردنی سزاکان.

 - هەموارکردنەوەی یاسای ژمارە ٣ی ساڵی ٢٠٠٩ی ئەنجومەنی پارێزگاکانی هەرێمی کوردستان.

 - هەموارکردنەوەی یاسای ژمارە ٦ی ساڵی ١٩٩٣ی ئەنجومەنی شارەوانییەکان.

٢- بەدامەزراوەکردنی سیستمی بەڕێوەبردنی هەرێم، بە شێوەیەک هیچ کەسێک لە سەرووی یاساوە نەبێت.

٣- دامەزراندنی دادگایەکی بەهێز و تایبەت بە بابەتی زیادەڕەوی و هەبوونی لق لە هەموو یەکە کارگێڕییەکاندا.

٤- دابەشکردنی یەکەی نیشتەجێبون بە سیستمێکی کارگێڕییانەی مۆدێرن، کە عەدالەتی تێدا بێت.

                                 

 

SHARE
وتاری زیاتر
۲٠٠ ملیارەکە!
د.رێبوار كریم محمود
بە وشەی (موزایەدە) ساردمەبنەوە!
د.رێبوار كریم محمود

زۆرترین خویندراوە لە مانگێکدا

لەگەڵمان بە لە Facebook

© Copyright 2021 - KEODD.ORG All right reserved Developed by kurdsoft