/ هەواڵ
رێكەوت زەكی: بۆ ئامادەكردنی پڕۆژەكە، ناتوانین سەقفێكی زەمەنی لە ئێستادا دیاریبكەین
2020-05-04
پاش ئەوەی ئەمڕۆ یەكەم كۆبوونەوەی لیژنەی تایبەت بە ئامادەكردنی پڕۆژەی سیستمی لامەركەزی بەڕێوەچوو،بەمەبەستی زانیاری زیاتر لەسەر كۆبوونەوەكە، (رێكەوت زەكی) ئەندامی فراكسیۆنی (یەكێتی نیشتمانی كوردستان)و هاوكات ئەندامی لیژنەی تایبەت بە ئامادەكردنی پڕۆژەی سیستمی لامەركەزی. لە لێدوانێكی تایبەتدا سەبارەت بە كاتی دیاریكراو بۆ ئامادەكرنی پڕۆژەكە، ناوبراو بە (پێگەی ئەلیكترۆنی رێكخراوی كوردستان بۆ هەمووان) رایگەیاند:
(ناتوانین سەقفێكی زەمەنی لە ئێستادا دیاریبكەین، چونكە ئەوە دەكەوێتەوە سەر ئەوەی چەندێك پێویستمان بە گفتوگۆكردن لەسەرپڕۆژەكەدبێت لە گەڵ پسپۆڕان.... بێگومان پلانی خۆمان هەیە، بەڵام بەدڵنیایەوە ئەم پلانە زیادكردنی بۆ دێتە پێشەوە چونكە لەوانەیە لە ئەنجامی هەر سەردانێك چەند سەردانێكی تری لێبكەوێتەوە، هەروەها بینینی بەڕێوبەڕەگشتیەكان بەیەك رۆژ نابێت هەروەك چۆن پارێزگارو سەرپەرشتیارانی ئیدارە سەربەخۆكانیش بە جیاواز دەبێت لەبەر ئەوە دیاریكردنی سەقفی زەمەنی تائێستا روون نیە چەندێكی پێدەچێت، لەبەر ئەوە كارەكە بەخێرایی تەواو نابێت.)
سەبارەت بە ناوەڕۆكی كۆبوونەوەكەش، ئەندامەكەی لیژنەی ئامادەكاری پڕۆژەی لامەركەزی رایگەیاند: (لە كۆبوونەوەكەدا هێڵە گشتیەكانمان دیاریكردو بڕیاردرا سەردانی مەیدانی بكرێت و هەروەها لەگەڵ نووسینی پڕۆژەكەشدا رای پیسپۆڕان و شارەزایان وەربگرین).
لەكۆتایشدا (رێكەوت زەكی) ئاماژەی بۆ ئەوەكرد كە لە كۆبوونەوەكەی ئەمڕۆدا هیچ خاڵێكی ناكۆك نەبوو لەسەر پڕۆژەكە.
شیاوی باسە (ئەنجومەنی پارێزگای سلێمانی) ماوەیەكە پرسی لامەركەزی كارگێڕی‌و دارایی وروژاندووەو داوای جێبەجێكردنی ئەو سیستمە دەكات بۆ ئەمەش لەبەرواری (30/4/2020) (ئازاد محەمەد ئەمین) سەرۆكی ئەنجومەنی پارێزگای سلێمانی فەرمانی ژمارە (290)ی دەركرد بەپێی ناوەڕۆکی فەرمانەکە ئامانج لەدروستکردنی لیژنەکە ئامادەکردنی پرۆژەی لامەرکەزی كارگێڕی‌و دارایی بەپێی یاسای ئەنجومەنی پارێزگاكانی هەرێم بۆ سنوری جوگرافی ئەنجومەنی پارێزگای سلێمانی کەپێکدێت لە پارێزگای سلێمانی و پارێزگای ھەڵەبجەو ئیدارەكانیی گەرمیان و ڕاپەڕین.