/ هەواڵ
(ئەنجومەنی پارێزگای سلێمانی) پڕۆژەی شەقامی (100)مەتری بەسەردەکاتەوە
2020-07-21
بەمەبەستی بەدواداچوون و چاودێركردنی قۆناغەكانی جێبەجێكردنی پڕژەی شەقامی (100) مەتری سلێمانی، ئەمڕۆ (21/7/2020) هاوکات لەگەڵ گردبوونەوەی بەشێک لە جووتیارانی ناوچەکە، کە هەوڵی ڕاگرتنی کارکردنیاندا لەبەشێکی پرۆژەی قۆناغی یەکەمی شەقامی سەد مەتری سلێمانی (لیژنەی پلان و پرۆژەکان)ی (ئەنجومەنی پاریزگای سلێمانی) سەردانی ئۆفیسی پرۆژەکەیان كردو لەگەڵ بەڕێوەبەری پرۆژەکە، گفتوگۆ لەسەر چۆنیەتی بەڕێوەچوونی کار و ئاستەنگەکانی بەردەم پرۆژەکە كرا...
لەوبارەیەوە (رەمەزان نامق) سەرۆكی لیژنەی (لیژنەی پلان و پرۆژەکان)ی (ئەنجومەنی پاریزگای سلیمانی) لە لێدوانێكی تایبەتدا بۆ (پێگەی ئەلیكترۆنی رێكخراوی كوردستان بۆ هەمووان) سەبارەت بە قۆناغەكانی جێبەجێكردنی پڕۆژەكەو رێگریەكانی بەردەم دواخستنی پڕۆژەكە خستە ڕوو...
سەرەتا سەرۆكی لیژنەی (لیژنەی پلان و پرۆژەکان)ی (ئەنجومەنی پارێزگای سلیمانی) ئاماژەی بۆ ئەوەكرد كە گرفتی زیادەڕەوی گەورەترین گرفتێكە كە رووبەڕووی پڕۆژەكەو كۆمپانیای جێبەجێكار دەبنەوە بەتایبەت لە ناوچەی (تانجەرۆ)دا كە ژمارەیەك پاڵاوگەی نەوتی نایاسایی‌و ژمارەیەك لە باخ‌و ڤێلای تێدایە، ناوبراو وتیشی: " گرتنەبەری رێکارەکانی قەرەبووکردنەوەی ئەو کەسانەی کە بە بەڵگەی یاسایی مافی قەرەبووکردنەوەیان هەیە، ولابردنی هەر زیادەرۆییەک بۆ سەرپێگەی پرۆژەکە کە دوور لەیاسا ئەنجام دراوە و بەسەرپێچی ئەژماردەکرێت...بەرپرسیاریتی ئەم کارانەش بەپلەی یەکەم لەئەستۆی ئیدارەی پارێزگای سلێمانی و شارەوانی سلێمانیدایە ..
هەروەها وتیشی لە ئێستا پڕۆژەكە نزیكی( 4 كم)ی زۆربەباشی كاری تێداكراوە، بەڵام گرنگە لە ئێستادا حكومەت بێتە سەرخەت‌و رێكاری یاسایی بگرێتەبەر ئیشی كۆمپانیا قەرەبووكردنەوەو لابردنی زیادەڕەوی نییە‌و ئیشی ئاگاداركردنەوەی جوتیاران نییە، بەڵكو كۆمپانیا ئیشی جێبەجێكردنی پڕۆژەكەیە، پێویستە لایەنە پەیوەندیدارەكانی وەك پارێزگارو شارەوانی بەمكارە هەستن‌و ئەوان لە رێی تیمی تایبەتی خۆیانەوە بەو كارە هەستن ئەوەی مافی قەرەبووی هەیە قەرەبوو بكرێتەوە و لە زووترین كاتدا مامەڵەی قەرەبووی جوتیارەكان تەواو بكەن ئەوەشی زیادەرەوییە لای بدەن كە بەداخەوە بەشێكی ئەو زیادەڕەویانە لەدوای دیاریكردنی دیزاینی پڕۆژەكەوە كراون....
سەبارەت بە كاركردنی كۆمپانیاكە، ناوبراو وتی: تائێستا كە قسەی تیادەكەین لە كاری كۆمپانیاكە رازین و بڕیاریشە كۆمپانیاكە دوای جەژن لە ناوچەی (دەمركان) لەلای عەربەتەوە بەهەمان شێوە دەست بەكاركردن بكات، چونكە ئەو ناوچەیە كێشەی نییە دەیانەوێت پێش وەرزی باران بارین لانیكەم ئاڕاستەی شەقامەكە دیاری بكەن
شیاوی باسە پڕۆژەی شەقامی (100) مەتری سلێمانی ساڵی (2013) بەردی بناغەی بۆدانرا بەڵام پڕۆژەكە جێبەجێنەكراو، ئەم ساڵیش بەهەمان شێوە لەبەرواری (11/7/2020) بۆ جاری دووەم بەردی بناغەی پڕۆژەكە دانرایەوە ، (رەمەزان نامق) لە كۆتاییدا ئەوەشی دووپاتكردەوە كە وەك (ئەنجومەنی پارێزگای سلێمانی) بەردەوام دەبن لە چاودێریكردنی قۆناغەكانی جێبەجێكردنی پڕۆژەكەو راپۆرتی تایبەتی خۆمان دەبێت لەسەر پڕۆژەكە هەروەها بڕیاریشە لە هەفتەی داهاتوودا سەردانی شارەوانی سلێمانی بكەین بەمەبەستی داواكاری و قەرەبووی جوتیارەكان و پلان و بەرنامەی سارەوانی تایبەت بە زیادەوڕەویەكان....